Thursday, October 1

‘बर्दी फुकालेर जोगी बन्छु तर कानुनमा सम्झौता गर्दिन’

काठमाडौं । ‘म कानुन पालना गर्ने र गराउने कुरामा चुक्दिन, बरु बर्दी फुकालेर जोगी बन्छु । बागमती किनारमा कुटी बनाउन त पाइएला नि ! एसएसपी विश्वराज पोखरेललाई मृत्युसँग डर छैन,’ शनिबार काठमाडौंको चाबहिलमा आयोजिता नागरिक–प्रहरी अन्तरक्रियामा काठमाडौंका एसएसपी विश्वराज पोखरेलले नागरिकहरुको बीचमा भने । लगातार २ घण्टा नागरिकका प्रश्न, गुनासा, जिज्ञासा र आरोप सुनिसकेपछि पोखरेल केही भावुक र केही कठोर मुद्रामा प्रस्तुत भए ।

मुलुकमा परिवर्तन आएपछि प्रहरी पनि व्यावसायिक र लोकतान्त्रिक चरित्रको बन्ने प्रक्रियामा रहेको बताउँदै उनले शान्ति, सुशासन र अमनचयनका लागि प्रहरी लागिपरेको बताए । अपराधका हिसाबले काठमाडौं डरलाग्दो अवस्थामा गइरहेको बताउँदै उनले आम नागरिकलाई सुरक्षामा खतरा हुने विषयमा प्रहरीलाई सूचना दिन आग्रह पनि गरे ।

काठमाडौंमा लागु औषधको व्यापार र प्रयोग, गुण्डागर्दी, बलात्कार, महिला हिंसा र भ्रष्टाचार बढेको स्वीकार गर्दै एसएसपी पोखरेलले त्यसलाई न्यूनीकरण गर्न प्रहरी सक्रिय भइसकेको बताए ।

सार्वजनिक सुनुवाइ कार्यक्रमका एक सहभागी प्रवेश लामिछानेले साँझको समयमा तेस्रोलिंगीले आतंक मच्चाएको गुनासो गरे । रेनु गिरीले काठमाडौंमा अबेर साँझ महिलालाई एक्लै हिँड्ने वातावरण नभएको गुनासो गरिन् । कतिपय सहभागीले प्रहरीले नै गुण्डाहरुको संरक्षण गरेको आरोप लगाएका थिए । होटल व्यवसायमा हुने वेश्यावृत्तिदेखि टोले गुण्डासम्मको विषयमा नागरिकले प्रश्न गरेका थिए एसएसपी पोखरेललाई ।

पोखरेलले सुधार प्रहरीबाटै सुरु भएको बताउँदै राजनीतिक दलहरु, नागरिक समाज र अन्य क्षेत्रले पनि आफूलाई सच्याउन जरुरी रहेको बताए । राजनीतिक आवरणमा हुने अपराध तथा गुण्डागर्दीविरुद्ध आफू नचुक्ने उनको दाबी थियो । केही सहभागीले पोखरेललाई काठमाडौंमा केही दिन काम गरेको जस्तो देखाएर कमाउने धन्दा त होइन भन्दै आशंका पनि गरेका थिए । एसएसपी पोखरेलले आफू भ्रष्टाचार नगर्ने र नसहने प्रवृत्तिको मान्छे भएको तर्क गर्दै सरकारले दिएको बर्दी, हतियार र जिम्मेवारीको दुरुपयोग नगर्ने बताए ।

नागरिकहरुले रातिको समयमा प्रहरी सुरक्षा बलियो बनाउनुपर्ने, अवैध गर्भपतन रोक्नुपर्ने, विद्यालय क्षेत्र वरपर मदिरा प्रतिबन्ध गर्नुपर्नेलगायतका माग राखेका थिए । –नेपालीअनलाइनपत्रिकाबाट